Gizarteratze-enpresek, nekazaritzako elikagaien kooperatibek eta eragile publikoek sektoreko eskulan-beharrei erantzuteko eta egoera ahulean dauden pertsonentzat enplegu-aukerak sortzeko formula berriak aztertu dituzte

Erriberri, 2026ko irailaren 11. – Nafarroako Nekazaritzako Elikagaien Kooperatiben Batasunak (UCAN) eta Nafarroako Gizarteratze Enpresen Elkarteak (EINA) INSERAGRO proiektuaren lehen lan-jardunaldia egin dute gaur Erriberrin: “Berrikuntza nekazaritzako enplegu inklusiboan: gizarteratze-enpresa Nafarroako nekazaritzako elikagaien kooperatibismoarekin”. Ekimena gizarteratze-enpresen eta Nafarroako nekazaritzako elikagaien sektorearen arteko lankidetza-formula berriak esploratzeko eta diseinatzeko sortu da.

Topaketak gizarteratze-enpresetako, Administrazioko eta nekazaritzako elikagaien sektoreko ordezkariak bildu ditu, nekazaritzako enplegu inklusiboaren inguruko beharrak, esperientziak eta lankidetza-aukerak partekatzeko helburuarekin.

Jardunaldian Josenea, Ilundáin, Varazdin eta Mejana Gourmet gizarteratze-enpresetako ordezkariek hartu dute parte, baita Gizarteratzeko eta Gutxiengoen Arretarako Ataleko Marisa Berrade Echecónek eta Nafarroako Enplegu Zerbitzua-Nafar Lansareko zuzendari Esther Fernándezek ere. Nekazaritzako elikagaien sektorearen aldetik, Miranda Argako Valdevilloco Kooperatibako, San Martín de Unx Kooperatibako eta Caparrosoko Santo Cristo Kooperatibako ordezkariek parte hartu dute, Diego Galilea ALINAReko kudeatzailearekin eta EHNE eta UAGN nekazaritzako erakunde profesionaletako ordezkariekin batera.

Gainera, Oskotz/Oscotz-ko San Miguel de Aralar Kooperatibak, Andosillako San Sebastián Upategi Kooperatibak, Valtierrako La Esperanza Nekazaritza Kooperatibak eta AN Taldeak aurretik helarazi zizkioten UCANi nekazaritzako enpleguarekin lotutako beharrak, eta horiek proiektuaren esparruan garatutako analisian eta lanean txertatu dira. Parte hartu duten eragileen eta jasotako beharren aniztasunari esker, Nafarroako enpleguarekin, gizarteratzearekin eta laneratzearekin eta nekazaritza-jarduerarekin lotutako hainbat ikuspegi gehitu zaizkio eztabaidari.

Erantzun berritzailea erronka partekatu bati

Topaketa hau lehen urratsa da Nafarroako errealitatera egokitutako nekazaritzako gizarteratze-enpresaren eredu posible baten diseinuan aurrera egiteko, nekazaritzako elikagaien sektoreko eskulan-beharrei erantzuteko eta, aldi berean, kalitatezko gizarteratze- eta laneratze-ibilbideak sortzeko.

Nafarroako nekazaritzako elikagaien sektoreak, batez ere landa-eremu jakin batzuetan eta nekazaritza-kanpainetan, aldi baterako eskulan-behar handia izaten jarraitzen du. Egoera horrek erronkak dakartza bai ustiategi eta kooperatibentzat —langileak modu egonkorrean izateko zailtasunak baitituzte—, bai enplegu horietan sartzen diren pertsonentzat, batez ere zaurgarritasun-egoera handienean daudenentzat.

Errealitate horren aurrean, INSERAGROk ekonomia sozialeko bi eremu —nekazaritzako elikagaien kooperatibismoa eta gizarteratze-enpresak— konektatzea proposatzen du, erantzun bateratu bat aztertzeko. Helburua da nekazaritzako enpleguari egonkortasun eta kalitate handiagoa eman diezaiokeen eredu baterantz aurrera egitea, parte-hartzaileen enplegagarritasuna hobetzea prestakuntzaren eta laguntzaren bidez, eta, aldi berean, kooperatiben eta nekazaritzako elikagaien sektoreko beste eragile batzuen eskulan-beharrak asetzen laguntzea.

Jardunaldian, interesa duten gizarteratze-enpresen esperientziak eta gaitasunak partekatu dira, baita nekazaritza-sektoreak dituen beharrak eta baldintzatzaileak ere. Eragile publikoekiko elkarrizketari esker, gainera, enpleguarekin, prestakuntzarekin eta gizarteratze-ibilbideekin lotutako alderdiak txertatu ahal izango dira etorkizuneko ereduan.

Jardunaldia proiektuaren bigarren fasearen parte da, diseinu parte-hartzailean zentratua. Lehen hilabeteetan egindako diagnositik abiatuta, UCANek eta EINAk elkarrekin lan egingo dute erakunde interesdunekin, eredu horrek izan beharko lituzkeen ezaugarriak zehazteko.

UCAN eta EINArentzat, gizarteratze-enpresen eta nekazaritzako elikagaien kooperatibismoaren arteko lankidetza aukera bat da landa-enpleguaren erronkari ematen zaizkion erantzunetan berritzeko, onurak sortuz bai pertsonentzat bai enpresentzat, eta Nafarroako ekonomia soziala eta lurralde-kohesioa indartzen lagunduz. INSERAGRO proiektua Nafarroako Ekonomia Sozialaren III. Plan Integralaren (III. PIES) esparruan garatzen da, eta gizarte-berrikuntzako eredu baten alde egiten du, behin baliozkotuta, beste lurralde eta jarduera-eremu batzuetan erreplikagarria izan dadin.

Lehen jardunaldi honen ondoren, proiektuak lan-saio berriekin jarraituko du gizarteratze-enpresen, kooperatiben eta nekazaritzako elikagaien sektoreari lotutako eragileen artean, detektatutako beharrak eta aukerak zehazteko eta gizarteratze-ibilbidearen diseinuan aurrera egiteko. Azken helburua da lan bateratu horrek Nafarroan nekazaritzako enplegu inklusiboko lerro berri baten oinarriak ezartzea, sektoreko eskulan-beharrak eta gizarteratzeko eta laneratzeko benetako aukerak uztartzeko gai izango dena.

Nafarroako Gobernuaren 2026ko ekonomia sozialeko erakundeen arteko lankidetza eta berrikuntza sustatzeko dirulaguntzak finantzatutako proiektua.